Serokê Partiya Tevgera Neteweperest (MHP), Devlet Bahçeli jî îro li meclisê li komcivîna partiya xwe axivî û got ku ew ji hikumetê hêvî dike ku hikumet sûcdar û bêsûcan tevlihev neke.

Hevserokê Giştî yê HDPê Selahattîn Demirtaş ragihand ku divê pêvajoya çareseriyê ji nû ve dest pê bike û demildest tecrîda li Îmraliyê were rakirin û bangî lîderên partiyan kir ku di bin banê meclisê de civînekê li dar bixin.

Di çarçoveya lêpirsînên derbarê hewldana derbekirinê de heta niha li 41 zanîngehan herî kêm 1294 xebatkarên akademiyê 323 jî karmend ji wezîfeyê hatin dûrxistin. 234 kes hatin binçavkirin û 8 kes jî hatin girtin.

Ji dema Tirkiyeyê balafira Rûsyayê xistî ve, cara pêşiyê ye ku wezîrekê Tirkiyeyê çû Rûsyayê. Cihgirê serokwezîrê Tirkiyeyê, Ahmet Şîmşek çû Rûsyayê û diyar kir serokkomarê Tirkiyeyê Recep Tayyîp Erdogan jî dê di 9ê tebaxê de biçe Rûsyayê.

Hevseroka Giştî ya HDPê Figen Yuksekdag got: ‘Me dît ku girseyên ku li dijî derbekirinê derketine qadan, derbekirineke din bikin. Eger bo herkesê garantiya demokrasiyê neyê dayîn, ew kom û girseyana ber bi hêzeke derbekirinê ve xwe pêş bixin.’

Li navçeya Farqînê ya Amedê li ser leşkerên parastina bendavê bi rokêtan êrîş hat kirin, leşkerek bi êrîşê mir.

Waliyê Stenbolê yê berê Huseyin Avni Mutlu hat binçavkirin. Mutlu piştî 15ê Tîrmehê hewldana derbekirinê ji wezîfeyê hatibû dûrxistin.

Serdozgerîya Stenbolê ji bo lêpirsîna Cimaeta Fethullahî biryara desteserkirina 42 rojnamegeran dabû, Nazli Ilicak yek ji wan rojnamegeran bû û polîsan ew li navçeya Bodrûmê ya Mûglayê desteser kir.

Civîna Erdogan û serokên AKP, CHP û MHPê bi dawî bûn. Piştî civîna ku HDPê gazînekiribûn, ti daxuyanî jî nehat dayîn. Hat ragihandin ku Lijneya Wezîran jî wê di bin serokatiya Erdogan de wê bicive.

Di çarçoveya lêpirsîna derbarê hewldana derbekirinê de li Antalyayê 14 rojnameger hatin binçavkirin.

Orhan Kemal Cengîzê dadnas û rojnameger, pêvajoya desteserkirina xwe, şêweyê desteserkirinê û pêvajoya çûna dozgeriyê ji bianetê re got.

Di encama dengdana îro ku li Lijneya Giştî yê HSYKê pêk hat de 267 kes li Dadgeha Bilind, 75 kes jî li Dadgeha Şêwirmendiyê hatin wezîfedarkirin.

Hevserokê Giştî yê HDPê Selahattîn Demirtaş derbarê hevdîtina ku Erdogan gazî HDPê nekiribû de got: ‘Gazînekirina partiya nûnerê girseya ku di nav civakê de pirsgirêka sereke dijî nîşanê me dide ku li Tirkiyeyê pirsgirêk wisa hêsanî çareser nabe.’

Ji 14ê Adarê ve li navçeya Nisêbînê ya Mêrdînê derketina derve qedexe ye, Walîtîya Mêrdînê da zanîn ku walîtîyê ji bilî şeş taxan qedexeya derketina derve ya Nisêbînê rakiriye. Li cihên qedexe lê hatîn rakirin jî dê 30 rojan di navbera sietên 21:00 û 05:00ê de, derketina derve qedexe be.

Polîsan, ji bo lêpirsîna derbeya 15ê Tîrmehê li 5 bajaran 31 akademîsyen desteser kirine.

Serokomar Erdoganî ji bo hevdîtinê gazî 3 partiyên di meclisê ne kir, lê gazî HDPê nekir. Parlementerê HDPê yê Îzmîrê Ertugrul Kurkçu sedema gazînekirina HDPê de got: ‘Ev hewldana sînorkirina rejîma nû ye.’

Piştî hewldana derbekirinê ev cara duyeme ku li dijî Fermandariya Akademiya Herbkirinê operasyon tê kirin. Di encama operasyona îro de 40 kes hatin binçavkirin.

Serdozgeriyê ji bo lêpirsîna derbeya 15ê Tîrmehê biryar daye 42 rojnamegeran desteser bike, Nazli Ilicak jî yek ji wan rojnamegeran e.

Serokwezîr Yildirim got: ‘Me destpêkirina hewldanê piştî 15 deqeyan ji parazvanên derdorên me û ji heval û hogirên xwe bihîst.’

HDPê wê sibê li Stenbol Sultangaziyê bi durişma ‘Ji derbeyê re na, demildest demokrasî’ çalakî li dar bixe.