4emîn Dadgeha Cezayê Giran a Konyayê îddianameya têkildarî qetilkirina malbata Kurd ya Dedeogullari qebûl kiriye. Di îddianameyê de ji bo kesê bi navê Mehmet Altun ku 7 endamên malbata Kurd qetil kiribûn, 7 caran cezayê zindanê ya heta hetayê ya girankirî hatiye xwestin. Herwiha 5 bersûcên dozê jî serbest hatine berdan.

Selahattîn Demîrtaş, Hevserokê Giştî yê berê yê HDPyê bi îdiaya heqaret li Ahmet Davûtoglû, Serokwezîrê demê kiriye tê dadgehkirin. Demîrtaşî li dadgehê gotiye, “Ger wan bizanîba wê Davûtoglû ji AKPyê veqete ev doz venedikir.”

Wezareta Tenduristiyê aşkere kiriye ku di 24 saetan de test ji bo 363 hezar û 238 kesan hatine kirin û di encamê de testa 29 hezar û 764 kesan pozîtîf derketiye, 246 kes pê mirine.

Stranbêj Aynûr Dogan wê beşdarî Festîvala Jazzê ya Londonê ya bi navê EFGyê bibe.

Talîbanê li Afganistanê bikaranîna pereyên biyanî qedexe kiriye.

Li Tirkiyeyê her sal di navbera 120 hezar û 360 hezarî de karker bi nexweşiyên pîşeyî dikevin.

Enflasyon di meha Çiriya Pêşiyê de li gorî meha berê ji 2,39 zêde bûye û di nav salekê de jî %19.89 bilind bûye.

54 saziyên navneteweyî yên çapamenî û azadiya derbirînê de ji bo rojnameger Nedîm Turfent ku 2 hezar roj in girtî ye daxuyaniyeke hevpar dane û banga serbest berdana wî kirine.

Heyeta dadgehê di doza Kobaniyê de ji Midûriyeta Giştî ya Emniyetê xwestiye ku zanyariyan derbarê “çalakiyên DAIŞê” de ji wan re bişînin. Lê Midûriyeta Emniyetê ev daxwaz bicih neaniye.

Mêran di meha Çiriya Pêşiyê de tundkarî herî hindik li 53 jinan kiriye, herî hindik 2 zarok kuştine. Mêran, zarokên kur jî di nav de herî hindik îstismar li 49 zarokan kirine, herî hindik 280 jin tacîz kirine. Mêran bi darê zorê karê seksê herî hindik bi 79 jinan dane kirin.

Dozgerî xwestiye weşanger û nivîskar Azad Zal bi 15 sal cezayê girtîgehê were cezakirin.

Wezareta Tenduristiyê aşkere kiriye ku di 24 saetan de test ji bo 361 hezar û 533 kesan hatine kirin û di encamê de testa 29 hezar û 796 kesan pozîtîf derketiye, 224 kes pê mirine.

Milyonek mirovî ew metna ku çalakvanên îklîmê, Vanessa Nakate, Dominika Lasota, Mitzi Jonelle Tan û Greta Thunberê nivîsandiye, îmze kiriye. Çalakvanên îklîmê bang li serokan kiriye ku krîza îklîmê demildest qabûl bikin û dest bi liv û tevgerê bikin.

DFGê di rapora xwe ya meha Çiriya Pêşiyê de diyar kiriye ku binpêkirina mafên rojnamegeran zêde bûne, 3 rojnameger hatine desteserkirin, êriş li 6 rojnamegeran hatiye kirin û dadgehkirina 58 rojnamegeran berdewam kiriye.

Li Rihayê li Ûgûr Tekstîlê karkerên ku bi Kod-18ê ji kar hatibû avêtin dîsa dest bi kar kirine. Mehmet Turkmen, Nûnerê Herêmê yê Tekstîlê yê DISKê gotiye, “Yekitî, têkoşîn û piştgirî biserket.”

Derbarê Şefîka Gultekîn, dayika Pinar Gultekîna ku Cemal Metîn Avci ew qetil kiribû de ji ber ku gilîyê wê hatiye kirin lêpirsîn hatiye destpêkirin.

Derhênerê lîsta “Mem û Zîn”ê Mîrza Metînî got, “Lîstika Mem û Zîn xwe dispêre xebatên lîstikvaniyê ku navê wê ‘Dîwan’ e. Bîner dê çîrokeke gelerî bi sehnekirineke nûjen temaşe bikin.”

Li gorî rapora meha Çiriya Pêşiyê ya CFWIJê, li Tirkiyeyê herî hindik 15 rojnamegerên jin ji ber karên xwe yên rojnamegeriyê, tacîz û tundkarî li wan bûye.

Osman Kavalayî ji Girtîgeha Sîlîvriyê peyamek şandiye û gotiye, “Piştî ku ji jiyana min çar çû tişta ku dê ez teselliyê jê bigirim ew e, dibe ku tiştên ez pê re rûbirû mabim tevkariyê li rûbirûmayîna bi pirsgirêkên li dadgeriyê re bike û yên piştî min ê ku derkevin pêşberî dadgehê wê bi awayekî adîltir miemeleyê bibînin.”

Demîrtaşî bal kişandiye ser sînordanînên hevdîtinên bi malbat û parêzeran re û gotiye, “Girtîgeha Edîrneyî di 20 rojên dawiyê de bi slogananên protestokirinê dinale, deng tê we?”