Ev demeke ku gelek wêneyên jina ciwan Nûrhîn El-Hisênê li ser gelek hesabên medya civakî tên parvekirin. Di her wêneyekî wê de mirov dikare bêje ku mijar û bûyerên li çar aliyên welêt diqewimin û her wiha wêneyên çanda gelê kurd bi xêzên reşikî hatine xêzkirin, hene.
Nûrhîn El Hisênê têkildarî hunera xwe bi bianetê re axivî.
Nurhîn El-Hisên jineke 25 salî ye û ji Rojava ye. Ew jî wek gelek kesên ku hevîrê hunermendiyê bi wan re heyî hê di zaroktiya xwe de dest bi xêzan kiriye û her çûye ev meraqa wê rê li pêşiyê vekiriye ku bi her awayî berê xwe bide hunera wênesaziyê.
El Hisênê diyar kir û got: “Ji zaroktiya xwe ve min ji xêzkirinê hez kir, ev 8 sal in min xwe di vî warî de pêş xist. Min xwest ez xwe bi pêş bixim ku bibim hunermendek kurd û xwe bi tabloyên kurdan ronî bikim.”
“Divê civak jî piştgiriya hunerê bike”
Wênesaza ciwan Nûrhîn El Hisênê di tabloyên xwe de berê xwe daye meseleyên kurdan û bûyerên li Rojava diqewimin:
“ Ez dixwazim bi tabloyên xwe pirsgirêka kurd û çanda kurdî derxim pêş û tiştên ku her roj tên serê me ji hemû cîhanê re ragihînim. Jixwe têkiliya di navbera civak û hunerê de bi hev ve girêdayî ye. Huner bixwe neynika civakê ye. Di civakê de hem erênî hem jî neyinî çi hebe bi rengê şêwekarî, bi rengê civakê derdixe holê ji bo civakên dîtir. Bi rêya hunerê bêtir rêya famkirinê vedibe.
Dema berê hunermendan (wênesaz, sitranbêj, şêwekar, şanoger, sînema û hwd) li civakê be rengê wê hunerê jî delaltir dibe. Bêguman divê civak jî piştgiriya hunerê bike. Yanî bi kurtasî têkiliya di navbera hunerê û civakê de divê wek xelkeya zincîrê be ku de hevdû mezintir bikin.”
“Huner jî deriyek e ji bo me”
Di dawiya axaftina xwe de Nûrhînê diyar kir ku ji bo em wek gelê kurd berxwedana xwe, êş û birînên xwe, niheqiyên li ser kurdan li tevahiya cîhanê belav bikin di vê sedsalê de divê em vê yekê bi hunerê jî bînin ziman û vî deriyî her tim vekirî bihêl in.”
(WS/AY)
