Li ser sûrên dîrokî yên Amedê bi meşaleyan Newroz hat pîroz kirin

Di çerçoveya bernameya Newrozê de duh êvarê li ser sûrên Amedê bi pêşengtiya Tevgera Jinên Azad (TJA) bi meşale û erbaneyan Newroz hat pîroz kirin.

Wesîla Torî

Starta Newroza 2025an di 11ê Adarê de hat dayîn û yekem agirê Newroza îsal li Lîceyê hat vêxistin.

Di çerçoveya bernameya Newrozê de doh êvarê li ser sûrên Amedê bi pêşengtiya Tevgera Jinên Azad (TJA) bi meşale û erbaneyan Newroz hat pîroz kirin.

Parlamenterên DEM Partiyê, hevşaredarên Bajarê Mezin ên Amedê û yên navçeyên navendî, endam û rêveberên Rêxistinên Bajêr ên DBPê û DEM Partiyê, saziyên sivîl ên civakî û bi sedan kes tev li pîrozbahiya Newrozê bûn.

Girseya li ber dahol û zirne û stranên hatin lêxistin govend gerand pişt re meşale vêxistin.

Girse bi meşale û erbaneyan derket ser dikê û dirûşmên “Newroza te pîroz be ey Serok Apo”, “Newroz pîroz be” , “Jin Jiyan Azadî” berzkirin.

Girseya ku pişt re ji sûran hate xwarê li ber stran û dahol zirneyê govend gerand.

Piştre Hevseroka DEM Partiyê ya Amedê Gulşen Ozer axivî, Newroz li kesên tev li bernameyê bûn pîroz kir û wiha got: “Îsal dê Newroz bibe Newroza aştî, azadî û aramiyê.”