Ji bo nûçeya tirkî / ingilîzî bitikîne
Parêzerên Abdullah Ocalanî li Taxim Hill Hotela Stenbolê derbarê hevdîtina bi Ocalanî re civîneke çapemeniyê li dar xistin. Parêzerên Ocalanî Faîk Ozgur Erol, Newroz Ûysal û Rezan Saricayî derbarê pêvajoya hevdîtinê û peyama Ocalanî de axivîn.
Ocalanî di peyama xwe de bal kişandiye ser rewşa girtiyên di greva birçîbûnê de ye û wiha gotiye: “Em hurmetê nîşanî berxwedana hevalên li girtîgehan û li derve didin, lê dixwazin bi taybetî destnîşan bikin ku divê negihînin asta ku rewşa wan a tenduristiyê bixe nava metirsiyê û rê li ber mirinê veke. Ji bo me, tenduristiya aqlî, fîzîkî û ruhî ya wan di pêşiya her tiştî de ye. Her wiha em di wê baweriyê de ne ku nêzîkatiya herî bi wate, xurtkirina sekna zîhnî û ruhî ye.”
Di destpêka civîna çapemeniyê de Faîk Ozgur Erol axivî û bal kişand ser pêvajoya hevdîtina bi Oclanî re.
Parêzer Faîk Ozgur Erolî diyar kir ku 4 parêzeran ji bo hevdîtina bi Ocalanî serî li dozgeriyê daye lê tenê ji bo du parêzeran ev daxwaz hatiye qebûlkirin. Di encama vê rewşê de parêzer Newroz Ûysal û parêzer Rezan Sarica di 2yê Gulanê de çûne Grava Îmraliyê û bi Ocalanî re hevdîtinek pêk anîne.
Ocalan peyamek şandiye
Erolî destnîşan kir ku hevdîtin bi qasî saetekê berdewam kiriye û Ocalanî di encama vê hevdîtinê de metnek bi wan re par ve kiriye. Lê rayedarên dewletê ev metin roja şemî yekşemê radestî wan kiriye, ji ber wê aşkerekirina wê jî maye îro.
Piştî ku parêzer Faîk Ozgur Erolî daxuyaniya xwe qedan, parêzer Rezan Sarica li ser navê Biroya Hiqûqê ya Asrinê metnê ku behsa pêvajoya hevdîtinê dike xwend.
810 caran serî lê dane
Saricayî got ku herî dawî wan 27ê Tîrmeha 2011ê hevdîtinek bi muwekilê xwe re pêk aniye û heta niha 810 caran serî lê dane lê nehatiye qebûlkirin. Saricayî wiha berdewam kir:
“Digel ku me xwest bi muwekîlên me yên din, birêz Weysî Aktaş, birêz Hamilî Yildirim û birêz Omer Hayrî Konarî re jî hevdîtinê bikin, ev nehate qebûlkirin. Dîsa weke carên berê me vê carê jî xwest ku em çar parêzer biçin serdanê, lê tenê ji bo du parêzeran destûr hate dayîn.”
Daxwaza malbatê nehatiye qebûlkirin
Saricayî ew zanyarî par ve kirin ku di dema hevdîtinê de destûr ji bo nivîsandina axavtinan û dan û standina belgeyan nehatiya dayîn. Her weha piştî vê hevdîtinê, malbatan ji bo di 6ê Gulanê de biçin hevdîtinê bikin serî lê dane, lê ev nehatiye qebûlkirin.
Saricayî bal kişand ser rewşa Ocalanî û astengkirina hevdîtinên bi wî re û ev rewş weke “metirsiyê” binav kir. Rezan Saricayî destnîşan kir û got, ew nizanin ku wê hevdîtinên Ocalanî bi parêzeran re bi awayekî bi rêk û pêk berdewam bike yan na.
Bi qasî saetekê hevdîtin pêk hatiye
Li gorî gotina Saricayî, îdareya girtîgehê rojnameyên rojanê yên ji bo Ocalanî tên şandin, nadine wî, her weha nameyên ji bo parêzerên xwe dinivisîne tên astengkirin. Parêzerê Ocalanî ev rewş weke binpêkirina mafê ragihandinê nirxand.
Piştî Saricayî parêzer Newroz Ûysalê metna ku Abdûllah Ocalanî û her sê girtiyên din ên li Girtîgeha Îmraliyê dimînin, Hamilî Yildirim, Omer Hayrî Konar û Veysî Aktaşî amade kiriye, xwend.
Parêzer Çîçek: Wê berxwedêr biryarê bidin
Cengîz Çîçek, parêzerê Ocalanî û Hevserokê HDPyê yê Stenbolê piştî civîna çapemeniyê, li ser pirsekê ji bianetê re diyar kir ku “Mesaja Ocalanî gelekî aşkere ye û berxwedêr bi xwe wê biryara bidawîanîna li greva birçîbûnê bidin”. Çîçekî her weha got ku, “Ev hevdîtin bi serê xwe nayê wateya ku tecrîda li ser Ocalanî bi dawî bûye”. (HA/FD)
