Ji bo nûçeya tirkî / ingilîzî bitikîne
8em Daîreya Cezayan a Dadgeha Bilind di dozekê de biryara beraetê ya dadgeha herêmî qebûl kiriye ku ji ber gotinên “Bila Birêz Abdullah Ocalan azad be ku li ber xwe dide û xwe radest nekiriye” li girtiyan hatibû vekirin.
Cemal Bozkûrt bi îdiaya “propagandaya rêxistinê kiriye li 16em Dadgaha Cezayê Giran a Stenbolê dihate dadkirin. Mûhammet Akyol, Vedat Duşkuner û Baysal Demîrhanê li Girtîgeha Tîpa F ya Tekîrdagê girtî, ji bo piştevaniya bi hevalê xwe re, daxwaznameyek ji bo heman dadgehê re nivîsandine û gotine “Sûcê ku Bozkûrtî kiriye em jî dikin”.
16em Dadgeha Cezayê Giran a Stenbolê gilîname ji bo vî tiştî amade kiriye û dadkirina her sê girtiyan sala 2012ê dest pê kiriye. Di encama van dadkirinan de dadgehê gotiye ku “sûc pêk nehatiye” û biryara beraetê ji bo Akyol, Duşkuner û Demîrhanê daye.
Serdozgeriya Komarî ya Stenbolê li hember vê biryara dadgehe derketiye û dosye şandiye Dadgeha Bilind. Dadgeha Bilind di 9ê Sibata 2019ê de biryara dadgeha herêmî pesend kiriye û daxwaznameya girtiyan weke azadiya xweîfadekirinê nirxandiye.
Parêzer Aksû: Biryar di nava şert û mercên roja me de azadîxwaz e
Înayet Aksû, parêzerê girtiyan diyar kir ku “di demeke wisa de ku bi tohmeta propagandaya rêxistina gelek kes tên cezakirin” ew biryara Dadgeha Bilind “azadîxwaz û adil dibîne”.
Gotinên di daxwaznameyê de hatine nivîsandin
Akyol, Duşkuner û Demîrhan bi tohmeta Li Dijî Sîstema Destûra Bingehîn derketine hîna li Tîpa F ya Tekîrdagê tên girtin. Her sê girtiyan di daxwaznameyên xwe de wiha nivîsandibûn:
“Birêz Abdullah Ocalan serokê Tevgera Kurdan a bi navê PKKyê ku li ber xwe dide. Em birêz Abdullah Ocalanî silav dikin ku li zindana Grava Îmraliyê jî di rêya azadî û aştiya bi rûmet a gelê kurd li ber xwe dide. Divê birêz Abdullah Ocalan demildest serbest bimîne, azadî ji bo Abdullah Ocalanî!
“Birêz Abdullah Ocalan serokê PKKyê û gelê kurd e ku li hemberî her cure hovîtiya dîktatoriya Kemalîst a faşîst li ber xwe dide û qet xwe radest nake. Digel ku di bin tecrîteke gelekî giran û taybet de yî birêz Abdullah Ocalan 13 sal in li Grava Îmraliyê ya dîl lê tê girtin, li ber xwe dide. Em wî û kesên li hemberî zilma faşîst li ber xwe didin bi hestên şoreşgerî û komunîst silav dikin. Divê birêz Ocalan bê şert û merc bê berdan”. (TP/FD)
