Pirtûka me ya destan a bi navê Nûçegihaniya Zayenda Civakî derket

Ji bo nûçeya tirkî / İngilîzî  bitikîne

bianetê pirtûkeke nû li pirtûkên xwe yên rojnamegeriyê zêde kir: Pirtûka Destan a Nûçegihaniya Zayenda Civakî.

Pirtûka destan ji hêla edîtorên bianetê Çîçek Tahaoglû û Elîf Akgulê ve hate amadekirin.

Pirtûka destan a ku ji 74 rûpelan pêk tê weke weşaneke Weşanên Weqfa Ragihandinê ya IPSyê hatiye çapkirin û weke hemû pirtûkên me bi nivîsa “Ji Weqfê” dest pê dike.

Prof. Dr. Şahika Yuksel Endama Lijneya Rêveberiyê ya Weqfa Ragihandinê ya IPSyê di vê nivîsê de wiha dibêje: “Ev pirtûk wek gavek jiyandina tiştên me xeyal kiriye pêk hatiye. Ji bo xeyalên xwe û xeyalkirinê em ê têkoşîna xwe berdewam bikin.”

Bi weşandina Pirtûka Destan a Nûçegihaniya Zayenda Civakî re bianetê duyem pirtûka xwe ya ji bo rojnameger û xwendekarên rojnamegeriyê li Pirtûkxaneya xwe ya BIAyê zêde kir.

Yeke pirtûka destan a vê beşê ji hêla Sevda Alankûşê ve hatibû nivîsandin û bi navê “Pirtûka Destan a Rojnamegeriya Aştîxwaz” bû.

Ew têgihiştina ku di pirtûka bi navê Nûçegihaniya Jinparêz de xeteke giştî jê re hatibû çêkirin, bi pratîka nûçegihaniya ku di nava salê de bianetê meşandiye dewlemend bûye û bi nûçegihaniya LGBTI+parêz re firehtir bûye. Ev têgihiştin weke halê xwe yê dawî di Pirtûka Destan a Nûçegihaniya Zayenda Civakî de xwe nîşan dide.

Yekem çapa pirtûka bi navê Nûçegihaniya Jinparêz a ji hêla Sevda Alankûşê ve hatibû amadekirin Çiriya Pêşiyê ya sala 2007ê, duyem çapa wê jî Kanûna Pêşiyê ya 2012ê derketibû.

Ev Pirtûka Destan di çarçoveya projeya Atolyeyên Nûçegihaniya Zayenda Civakî û Pirtûkxaneya Online de hate çapkirin. Proje bi piştgiriya darayî ya Fona Navbeynkar Ewropayê ya ji bo Demokrasî û Mafên Mirovan a Yekîtiya Ewropayê di navbera Nîsana 2016 û Hezîrana 2018ê de çêbûbû.

Sevda Alankûş supervîzora projeyê, Oznur Sûbaşi jî koordînatora wê bû. Me bi Cemiyeta Rojnamegerên Azad (CRA) re dest bi projeyê kiribû lê ev sazî di encama KHKyê de hate girtin. Di çarçoveya projeyê de li Stenbol, Mêrsîn, Bûrsa, Îzmîr, Eskîşehîr, Trabzon, Amed, Mûgla, Edirne û Dersimê bi beşdariya nûnerên rêxistinên jinan û LGBTIyan ên herêmî û rojnameger, akademisyen û xwendekarên fakulteyên ragihandinê re atolyeyên nûçegihaniyê hatin çêkirin. Proje bi KAOS GLyê re dihat meşandin.

Alankûş: Ji her demê zêdetir niha pêwistiya me ji vê rehberê heye

Prof. Sevda Alankûş Şêwirmenda Perwerdeyê ya BIAyê di Pêşgotina ku ji pirtûka destan re nivîsandiye de piştî behsa pêvajoya atolyeyan kiriye wiha nivîsandiye:

“Wek di xebatên me yên atolyeyên din de jî bû, di van atolyeyên me de jî hînkirina bi hev re çêbû û me xwest ku tiştên di vê pêvajoyê de derketine holê bi rêya vê pirtûkê bi we re parve bikin.”

Yek ji nivîskarên pirtûka destan Çîçek Tahaoglû heft sal in ku li bianetê karê edîtoriya nûçeyên jinan û LGBTIyan dike. Elîf Akgul jî ji sala 2013ê heta Hezîrana 2018ê li bianetê edîtora nûçeyên azadiya xweîfadekirinê bû. Her weha yek ji dersdêrên Atolyeyên Nûçegihaniya Zayenda Civakî bû.

Tahaoglû: Em hêvî dikin ku bandorê li pêvajoya veguhestinê bike

Çîçek Tahaoglû wiha behsa rehberê dike: “Me di vê pirtûka destan de di rastiyê de pratîka xwe ya li bianetê nivîsandiye. Li medyaya berbelav û alternatîf de zimanekî nûçeyan heye ku em dibînin û em hîn bûne ku em bibînin. Me ev ziman ewqas qebûl kiriye ku em dibin şahidê wan tiştan ku bêyî li ser bifikirin û bi gotina “nûçe ji xwe wiha tê nivîsin” peyvên cidaxwaziyê tên bikaranîn. Lê ev dema ku hesasiyeta civakî bilind bûye, têkoşîna tevgerên jinan û LGBTIyan bilind bûye û bêhtir xuya bûye, fersendeke baş e ji bo zimanê medyaya cidaxwaz veguheze zimanekî mafparêz û wekhev. Em hêvî dikin ku bandorê li pêvajoya veguhestinê bike.”

Akgul: Me behsa cehda xwe ya derbaskirina van xetayan jî kiriye

Elîf Akgulê jî got ku wan tecrubeyên di pêvajoya atolyeyan de derketiye holê di rehberê de nivîsîne:

“Di vê pirtûka destan de me behsa wan tiştan kiriye ku di Atolyeyên Nûçegihaniya Zayenda Civakî de me vedigot û tiştên ji wan zêdetir tê de hene. Dema ku me pirtûk amade dikir me sûd ji du tiştan wergirt; yek pirsgirêkên ku di dema atolyeyan de dihatin gotin û du jî ji nirxandinên ku piştî atolyeyan. Lê ji vê jî zêdetir ew xetayên ku di dema karê xwe de me dikir, ew rêbazên ku dihiştin haya me ji van xetayan çêbibin û hewla çareseriya van tiştan me behsa wan kiriye. Ji ber wê jî em hêvî dikin ku ev pirtûka destan bandorê li veguhestina ziman, zimanê rojnamegeriyê û rojnamegeriyê bike.”

Pirtûka Destan a Nûçegihaniya Zayendî piştî civîna danasînê wê vê hefteyê bi rêya Punto Dağıtımê bigihêje ber destê pirtûkfiroşan. Her weha wê di formata e-pirtûk de bi tirkî, kurdî û ingilîzî di Pirtûkxaneya BIAyê de ciyê xwe bigire. (HK/FD)

* Not: Ji bo zanyariyan derbarê civîna danasîna Pirtûka Destan a Nûçegihaniya Zayenda Civakî de bistînin hûn dikarin ji [email protected] re binivîsin ku civîn wê 29ê Hezîranê çêbibe.