Ji bo nûçeya tirkî / ingilîzî bitikîne
Walîtiya Edeneyê gotiye, şanoyê bi kurdî ya bi navê “Tartuffe” ku lîstika Molîêre e “ji bo temaşekirinê ne guncaw e” û qedexe kiriye. “Tartuffe” Şanoya Bajar a Amedê li gorî kurdî amade kiriye.
Walîtiyê biryara qedexeyê li gorî qanûna Îdarî ya bajaran ya bi hejmara 5442an, lîstika Kurdî bi hinceta “Aştî û ewlekariya di nava sînorên parêzgehê de xera dike” betal kiriye.
Bixwîne- Walîtiya Bûrsayê konsera Mem Araratî qedexe kiriye
Bixwîne- Walîtiya Mûşê konsera Metîn Kemal Kahramanî qedexe kiriye
Bixwîne- Du konserên Apolas Lermiyî asteng kirine
Bixwîne- Şaredariya AKPyê konsera Aynûr Doganê qedexe kiriye
Lîstika ku li Edeneyê hat qedexekirin sibe (6ê Hezîranê) wê li Mêrsînê bê lîstin. Her weha Walîtiya Edeneyê ji bo lîstikê gotibû “ji bo temaşekirinê ne guncaw e”, lê Walîtiya Mêrsînê gotiye "lîstik guncawe,"
Diviyabû lîstik li Salona Şanoyê ya Şaredariya Bajarê Mezin a Edeneyê bihata nîşandan.
Organîzator Sûat Ekîn bi Ajansa Mezopotamyayê re axiviye û bertek nîşanî biryara Walîtiya Edeneyê daye û gotiye: "A rast ji bo çalakiyên li hêwanan tên lidarxistin pêdivî bi destûra walîtiyê tune ye. Lê Midûriyeta Çandê ya Şaredariya Bajarê Mezin a Edeneyê ya CHP'î bi israr got, 'divê hûn destûrê ji walîtiyê bigirin, yan na em ê nehêlin bê lîstin.' Ev biryara qedexekirinê netehemulkirina kurdî ye. Min ji bo destûrê serî li Walîtiya Edeneyê da. Walîtî jî telefonî Şaxa Ewlehiyê kir. Şaxa Ewlehiyê jî telefonî min kir û ji min pirsîn 'lîstika we bi tirkî ye yan bi kurdî?' Min jî got, ma ferq dike? Gotin, 'na û herin kaxeza destûrê ji walîtiyê bigirin. Dê ew der bersiva we bide.' Min di kaxezê de nivîsa 'ne guncan e' dît. Ev, nîşaneya netehemulkirina kurdî ye. Em qebûl nakin." (RT/AY)
