Berdevkê Wezaretê û Şêwirmendê Têkiliyên bi Gel û Çapemeniyê re yê Wezareta Berevaniya Neteweyî (MSB) Tugamiral Zekî Akturk di civîna agahdarkirina çapemeniyê ya heftane de axivî.
Tugamiral Akturk diyar kir ku ji bo hevdîtinên teknîkî bikin duh(29ê Kanûnê) şandeyek ji wezaretê serdana Sûriyeyê kiriye û wiha got:
“Em careke din dibêjin ku em ê rê nedin li herêmê tu pêkhateyek terorîst çêbibe û em ê xebatên xwe ji bo zêdekirina kapasîteya parastinê û ewlehiya Sûriyeyê û ji bo misogerkirina vegera Sûriyeyiyan bi şêweyekî dilxwazî, ewle û rêzdarî bi hevkariya ji nêz ve bi rêveberiya nû re bidomînin."
Li gorî ajansa nûçeyan a fermî ya Sûriyê SANAyê şandeya leşkerî ya Tirkiyeyê serdana Şamê kir û bi Wezîrê Berevaniyê Murhaf Ebû Qasra û Sererkanê Giştî Elî Nasaan re civiya.
Li gorî Ajansa Anadoluyê, çavkaniyên Wezareta Berevaniya Neteweyî piştî civîna çapemeniyê ya li Wezaretê pirsên rojnamegeran bersivandin.
Li ser pirsên derbarê heyeta wezaretê de ku çavkaniyan ev agahî parve kirin:
"Me aşkere kiribû ku piştî dezgehên dewletê yên li Sûriyeyê dest bi xebatan bikin, em ê ji bo hevkariya di warê ewlehî û parastinê de bi muxatabên xwe re bicivin û piştre jî li gorî nexşerêya ku bê amadekirin em ê piştgiriya pêwîst bidin. Ji roja destpêkê ve têkiliya navbera rêvebiriya nû ya Sûriyeyê û fermandarên yekîneyên me yên li Sûriyeyê wezîfedar in, didomin.”
“Serdana duh girîng bû. Ji ber ku yekemîn şand e û yekemîn care ji fermandariya wezareta me serdana Sûrîyeyê dike. Di civîna duh de li ser tiştên ku di warê parastin û ewlehiyê de dikarin bên kirin, bi taybetî di şerê hevbeş li dijî rêxistinên terorîst ên ku hem ji bo Sûriye û hem jî ji bo Tirkiyê metirsî ne, hatin guftûgokirin. Hevdîtinên me dê di çarçoveya pêdiviyên ku di heyama pêş de derkevin holê bidomin.”
(VC/AY)
