‘Peyvên Kurdî’ bi kurdî dide fikrandin, kurdiyê dide naskirin

Nivîsar Ferhat Baysal, kurdî jî di nav de bi 8 zimanan lîstîkek dijîtal a bi navê “Peyvên Kurdî” çêkiriye.

Ferhat Baysal, sepana ‘Peyvên Kurdî’ bi zimanê kurdî, tirkî, înglîzî, elmanî, fransî, spanî, îtalî û rûsî amade kiriye. Sepan weha hatiye çêkirin ku li tablet û telefonên xwedî sîstema xebitandinê ya androîde bar dibe.

Ev lîstik a ku di navbera 20-30 hezar peyvî lê hatiye barkirin, di nava sepanên Google Play de cîhê xwe girtiye.

Ferhat Baysal pêştir jî sepana pêşbaziyek onlina ya kurdî çêkiribû. Her weha vê carê jî lîstika dijîtal ya bi navê “Peyvên Kurdî” pêşkeşî bikarhêneran kiriye.

Dixwaze kurdî bide naskirin

Nivîsar Baysal dema li peyv barakirinê de serî li nêrînên zimanasên kurdî daye.

Armanca Baysalî bi vê lîstika ku ji astan pêkhatiye ewe ku him kurdî bide naskirin, fêrkirinê hêsantir bike û him jî fikirandina bi kurdî pêşbixe.

Ferhat Baysal 4 salin li Belçîkayê li herêmeke pirzimanî ku li sînorê Luksembûrgêye dijî. Baysal endezyariya kompîterê dixwîne û ji bilî xwendinê demên xwe dide çêkirina sepanên kurdî.

Baysalî diyar kir ku dewleta Tirkiyeyê ji ber xebatên wî yê bi vî rengî zext li wî kirine û ew kiribûn armanc û ji ber van sedeman ew çûye Ewropayê.

Li Belçîkayê dijî

Baysalê ku penahendeyê Belçîkayê bûye xebatên xwe yê têkildarî nivîsbariyê li wir dewam kiriye. Her weha Baysalî destnîşan kiri ku ew li wî welatî perwerdeyê derbarê eqlê(artificial intelligence) çêkirî de digire.

Baysal derbarê xebata xwe ya sepana ‘Peyvên Kurdî’ de bi bîanetê re axivî û got:

“Eleqeya min ya bi Zimanê Kurdî re her dem hebû. Ji ber ku zimanê min ê dayîkê kurdiye. Ji ber vê yekê min xwest ez têkildarî Kurdî xebatek weha bikim.”

Baysal desntîşan kir ku Belçîka welatekî pirzimaniye û vê rastiyê jî bandor li wî kiriye û weha got:

“Bajarê ku ez niha lê dijîm bajarekî pirzimaniye her wekû bajarê Mêrdînê bajarê ku ez jê dayîk bûme. Vê rastiyê jî bandor li ser min çêkir ku ez xebateke bi vî rengî bikim û bi vê sepanê Belçîkiyan jî bi Kurdî re bidim nasandin.”

Min xwest behreya fikrandina bi kurdî zêdetir bibe

Baysal weha pêde çû: “Di heman demê de min xwest ku kesên bi kurdî diaxivin behreya wan ya fıkrandina bi kurdî zêdettir bibe. Lewma bi vê sepanê ji bo têgihîştina/çareserkirina peyvek divê demeke dirêj bifikire. Dahata herî mezin ya vê sepanê ewe ku pêşxistina behreya fikrandina bi kurdî ye.”

Bi van xebatan Kurdî wê zêdetir bê naskirin

Baysal weha axivî, “ Biyaniyên ku bi rêya vê sepanê bi kurdî re rû bi rû dimîne ji bo wan tişteke seyre. Ji ber ku kurdî heta di platformên pirzimanî de nîne.

Weke mînak, îtalyayîyek an go rûsek dema vê sepanê bi zimanê xwe dabigire wê bi zimanê kurdî re jî rû bi rû bimînin. Ev jî ji bo me girînge.”

Baysal destnîşan kir ku xebatên bi vî rengî çiqas bi pêş bikeve wê kurdî jî ewqas bê naskirin.

Ji bo hînbûna kurdî hêsankariyeke

Ferhat Baysal derbarê şêwazê bikaranîna lîstikê de ev agahî da û got, “Va sepana ji bo kesên ku bixwaze kurdî fêr bibe hêsankariyeke. Ji xwe di lîstikê de sîstemek dîyarkirî heye. Her zimanek astên wê hene. Heta astek neqede astên din girtî dimînin. Ji bo vê jî ji bo alikariyê taybetmeniyên cûr bi cûr hene. Bi xêra van taybetmendiyan dema bikarhêner bersiva peyvê nizanibe, dikare fêr bibe. Bi vî awayî dikare tişta ku lê digere bibine. Ev lîstîk di astên herî hêsan de destpêdike û berbi astên zihmet ve diçe. Di dawiya lîstêkê de jî asta kurdî ya bikarhêner tê nişandan. Ango îstatîstîkek weha heye ku asta zanîna bikarhêner û rêjeya zanîna bikarhêner ya peyvan dide ravekirin.”

Baysal diyar kir ku heta niha du projeyên wî yên temamkirî yê  bi navê “Peyvên Kurdî” û “Pirs” hene. Sepana Pirs, sepaneke pêşbaziya onlîne ya kurdî ye. Niha jî dest bi xebatekî nû kiriye û dema ku bi qede wê bide nasandin.

Lîstika ‘Peyvên Kurdî’ li cîhanê yekem lîstika onlîne a kurdî ye

Baysal bi bîr xist ku xebata wî ya yekem ‘Pirs’ e û 6 meh li pêş lîstika ‘Peyvên Kurdî’ amade kiriye û got:

“Li cîhanê yekem lîstika onlîne ya kurdî bû. bi fikire ku Kurdekî li dîasporayê dikaribû bi Kurdekî li gundê Amedê dijî ve ev lîstik bilîsta. Ev lîstik bi temamî onlîne ne û ji bi hezaran pirsîyar û bersivan pêktê. Bi temamî bernameyekî pêşbaziyê ye. Di heman demê de di lîstikê de puan tê dayîn daneyên pûanan jî hene. Vê xebatê gelek bal kişand. 15 hezar carî hatiye danîn. Di Google Playê de nêzîkî 2 hezar şîrove hat kirin. Di Google Playê de di nav sepanên herî zêde puan girtî de li ser 5an 4.9 puan girt.”

Baysal destnîşan kir ku kesên ku vê lîstikê dilîzin derbarê sinema, muzîk, wêja û dîroka Kurdan de gelek tişt fêr dibin.

Baysal diyar kir ku ji bo van xebatan wî piştgirî li tu partiyek an go saziyek negirtiye û weha got, “Ez van xebatan weke xwebexş bi derfetên xwe yên şexsî çêdikim û danîna van sepanan hemû belaşin.”(AY)