Ji bo nûçeya tirkî bitikîne
Parêzerê nivîskar Abdulmenaf Osmanê piştî 30 sal û 6 mehan ji girtîgehê derket, li dijî biryara “dersînorkirin” û “çavdêriya fermî” ya ji bo 6 mehan, serî li dadgehan da.
Osman di 3yê Îlonê de ji Girtîgeha Tîpa Tyê ya Akhîsarê ya Manîsayê tehliye bûbû û niha li Navenda Dersînorkirinê ya Edîrneyê tê ragirtin.
Parêzer Halîl Coşkûnî li dijî biryara dersînorkirinê serî li Dadgeha 1em a Rêvebirî ya Manîsayê û li dijî biryara çavdêriya fermî jî serî li Dadweriya 2yem a Aştî û Cezayî ya Edîrneyê da.
Li gorî nûçeya MAyê, parêzerî di daxwaznameya xwe de got, Osman yek ji wan kesan e ku li gorî Qanûna Hejmar 6458an nabe bêdersînorkirin. Her weha biryarên Dadgeha Destûra Bingehîn û Dadgeha Mafên Mirovan a Ewropayê bibîr xistine.
Coşkûnî diyar kir ku bêyî sedemên biryara dersînorkirinê bên nişandan, xalên yasayê hatine rêzkirin û ev jî ne hiqûqî ye.
Her weha got ku biryara dersînorkirinê ji hêla erk û karûbarên rêvebiriyê ve ne hiqûqî ye û ger biryar pêk bê, wê hin encamên telafîkirina wan ne mimkun e derkevin holê û jiyan û azadiya Osmanî bikeve xetereyê.
Bal kişand li ser dema yasayî
Parêzerî di daxwaznameyê destnîşan kir ku biryara çavdêriya fermî di nava xwe de gelek xalan binpê dike. Coşkûnî diyar kir ku bi vê biryarê mafê azadî û ewlehiya şexsî binpê dike û li dijî Xala 5an a Peymana Mafên Mirovan a Ewropayê û xala 19an a Destûra Bingehîn e. Parêzer Coşkûnî got ku tiştên beriya niha bi 30 salî pêk hatine, bûye sedema biryara çavdêriyê û ev jî li gorî yasayê tê waeya ku dem di ser re bihuriye.
Derbarê Menaf Osmanî de
Di sala 1965an de li Hasekê ji dayik bûye. Xwendina xwe ya seretayi û navîn û lîseyê li wir xwendiye. Pişt re li Zanîngeha Şamê Beşa Jeolojiyê xwendiye. Ji ber xebata xwe ya siyasî di sala 1993yan de hatiye girtin û cezayê mûebedê li birîne.
Pirtûkên wî: Girê Şêran, Şînok, Namûsname, Piling, Şoreşname 1, Silava Bajariyan, Sînor, Lênûska Leyla, Sêbareya Zindanê - 1: Cuhû, Sol. (NT/FD)
.jpg)
