Li Îzmîrê 5 endamên KESKê hatin girtin
Di çarçoveya lêpirsîna Serdozgeriya Komarî ya Îzmîrê de ji 21 endamên KESKê yên di 4ê Adarê de hatibûn desteserkirin 5 jê hatin girtin.
Piştî jêpirsîna roja Pêncşemê ya li dozgeriyê, bi îdîaya "endamtiya rêxistinê" û "fînansekirina rêxistinê" bi daxwaza girtinê sewqî Dadgeha Cezê û Aştiyê hatin kirin. Dadgehê biryara girtina Unal Kaymak, Hayri Aktaş, Seda Kaya, Adem Savaş Bulgur û Doganay Koguş da.
Endamên KESK Egîtîm-Senê di TEMê de ji bo çalakiyên weke piştî erdhejên 6ê Sibatê birina alîkariyê ji bo Hatayê, belavkirina erzaq, hiştina tiştên ku ji Egîtîm-Sen'ê re ji bo li kesên hewcedar bên belavkirin, piştgiriya ji bo kedkarên bi Biryarnameyên di Hukmê Qanûnê de ji kar hatine derxistin û hwd. Ji ber piştevanî û xebatên sendîkayî pirs li wan hat kirin
Beşek ji kesên hatibûn desteserkirin piştî jêpirsîna wan a li TEMê di 4ê Adarê de hatin berdan. 8 kesên ku sewqî Edliyeyê hatin kirin bi şertê kontrola edlî hatin berdan.
Ji bilî 5 endamên sendîkayê yên ku hatin girtin, hemû kesên ku roja Pêncşemê sewqî edliyeyê hatibûn kirin, bi şertê kontrola edlî serbest bûn.
Rayedarên KESKê: "Sûcdarkirin hiqûqî nîne"
Rayedar û parêzerên KESKê diyar kirin ku ji ber xebatên wan yên hiqûqî û mirovî girtina endamên sendîkayê, ji azadiya wan bêpar hiştin û bi sûcdarkirinê re rû bi rû mana wan, ne rewa ye.
Platforma Şaxên Îzmîrê ya Konfederasyona Sendîkayên Kedkarên Cemaweriyê (KESK) di daxuyaniya xwe ya çapemeniyê ya ku rojek berê li Karşiyakayê dabû de diyar kiribû ku ev desteserkirin bêtehamiliya desthilatdariya siyasî nîşan dide ku kesê ku mîna wan nafikire û dengê xwe bilind dike qebûl nake.
Berdevkê Demê yê Platforma Şaxên Îzmîrê ya KESKê Denîz Çetîn daxuyanî da çapemeniyê û got, "Hemû beşên civakê yên mûxalîf hedef tên girtin."
Çetîn anî ziman ku ji ber li hemberî zext û gefên desthilatê serî natewînin hatine desteserkirin û got ku ew ê heta dawiyê têkoşîna xwe bidomînin û xwest hevalên wan demildest bên berdan.
(AEK/AY)