*Fotograf: Houssam Shbaro/AA.
Ji bo nûçeya tirkî bitikîne
Li Beyrûta paytexta Lubnanê duh di saetên êvarê de teqînek mezin pêkhatiye.
Li gorî daxuyaniya Abbas Îbrahîm, Rêvebirê Giştî ê Saziya Ewlekariya Navxweyî teqîn li benderê di herêma 12em de pêkhatiye û cîhê ku teqîn çêbûye maddeyên teqemeniyê lê zêde bûne. Beyrût weke ‘Herêma karesatan’ hatiye ragihandin û li paytextê ji bo du hefteyan biryara rewşa awarte hatiye stendin. Her weha li wî welatî şîna neteweyî hatiye ragihandin.
Bi hezaran kes brîndar bûne
Li gor nûçeya El Cezîreyê Hassan Hamad, Wezîrê Tenduristiyê ê Lubnanê aşkere kiriye, herî kêm 63 kes miriye û ji 3 hezarî zêdetir kes birîndar bûne.
Hasan Dîab, Serokwezîrê Lubnanê jî derbarê teqînê de daxuyani daye û gotiye, “ Wê hesab li berpirsên karesata ku îro li Lubnanê çêbûye were pirsandin.”
Bandora teqînê li bajarê Lîmasola Kibrisê jî çêbûye
Li gorî nûçeya BBCê Emîlîa Papadopoulos, nûçegîhanê BBCê û pêşkeşkarê TVyê diyar kiriye, wan bandora teqînê li Lîmasola Kibrisê hîs kiriye û paceyên malan lerziya ye.
Teqîn şibandine teqîna Hîroşîmayê û Nagazakîyê
Mervan Abbûd, Waliyê Beyrûtê ji bo lêkolînê çûye cîhê bûyerê û li wir daxuyanî daye û gotiye, Beyrût bûye herêma karesatan û xesar û ziyan zêde ne.
Abbûdî teqîna li benderê pêkhatiye şibandiye teqîna Hîroşîmayê û Nagazakîyê.
Sekreterê Giştî ê Partiya Ketaîbê miriye
Nizar Necaryan, Sekreterê Giştî ê Partiya Ketaîbê di teqînê de miriye.
Çend roj mabû Dadgeha Lubnanê a Navneteweyî ya Neteweyên Yekbûyî(NY) biryara doza suîqesta Refîk Herîrî, Serokwezîrê berê ê Lubnanê aşkere bikiraba. Çêbûna teqînê li pêş biryarê bal kişandiye.
Dadgeha Lubnanê a Navneteweyî ya NYê aşkere kiribû, ku ewê di 7ê Tebaxê de derbarê doza sûîqesta Herîrî de wê biryarê bidin. (PT/AY/FD)
