Ji Chalak Eventsê “Sihbetên Çayê” ya 18em: Îlhan Samî Çomak

Chalak Events wê 18em bernameya Sihbetên Çayê li dar bixe. Di bernameyê de helbestvan Samî Çomak dê li ser mijara “Ware Qedexe: Helbesta Kurdî û Bezandina Dîwaran” biaxive. Bername wê bi pirs û bersivan bidome.
Moderatorê bernameyê Rêbîn Ozmen e û her weha helbestvan Çomak wê di bernameyê de şeva beşdaran bi helbestên xwe bi xemilîne.
Piştî bernameyê Îlhan Samî Çomak dê pirtûka xwe ya helbestan ya bi navê “Çiyayê Girtî” ji bo beşdaran îmze bike. Weşanên Dara ev pirtûk çap kiriye.
Bernameya ku bêpere ye di saet 20.00ê Yekşema 9ê Adarê de li Taksîma Stenbolê, li Nînova Cafeyê dê pêk were.
Chalak Evenst li benda we ne!
Derbarê Îlhan Samî Çomakî de
Dadgeha Bilind Cezayê Îlhan Çomakî di cara duyemîn de jî erê kir ku sala 1994ê dema li Fakulteya Fen-Edebiyatê ya Zanîngeha Îstanbûlê xwendekar bû bi tohmeta "endamtiya rêxistinê" hatibû girtin.
Îlhan Çomak di sala 2000î de ji hêla Dadgeha Ewlehiyê ya Dewletê ve rastî cezayê darvekirinê hatibû û dadgehê ceza veguhestibû cezayê heta heta yê girtîgehê. Piştî biryara erêkirinê ya Dadgeha Bilind, Çomakî serî li Dadgeha Mafên Mirovan a Ewropayê (DMME) dabû û dadgehê biryar girtibû ku Çomak "bi rengekî adilane nehatiye dadgehkirin". Çomak sala 2013ê careke din hatibû dadgehkirin lê dadgehê heman ceza lê birî bû.
Ji ber ku dema desteserkirinê de di bin îşkenceyê de zabitnameyên derbarê wî de hatibûn nivîsandin DMMEyê biryar girtibû ku careke din bê dadgehkirin. Duyemîn car dadgehkirina Çomakî di sala 2013yê de dest pê kiribû û hemû daxwazên ku di dema dadgehkirinê de biryara tehliyeyê derkeve nehatibûn qebûlkirin.
Dadgeha Destûrê jî di 28ê Cotmehê ya 2015ê de biryara tehliyeya Çomakî ret kiribû. Biryara cezayê heta hetayê ya 4emîn Dadgeha Cezayê Giran a Stenbolê ji bo Îlhan Çomakî dabû îro ji hêla 16emîn Daîreya Cezayan a Dadgeha Bilind ve hat erêkirin.
Çomak sala 1973yê li navçeya Kanîreşê ya Çewlikê ji dayik bûye û 4 pirtûkên wî yên helbestan hene.
(AY)