Hejmara kesên ku di şewata li Otela Grand Kartala Xişîngeha Kartalkayaya Bolûyê de mirine gîhaşt 76an. Her weha bi dehan kes jî birîndar bûn.
Wezîrê Karên Navxweyî Alî Yerlîkaya di daxuyaniya xwe ya êvara Sêşema 21ê Kanûna Paşiyê de ragihand ku şewat hatiye vemirandin, xebatên sarkirinê bi dawî bûne û xebatên lêgerîn û lêgerînê bi dawî bûne.
Yerlikaya diyar kir ku şev saet di 03:27an de şewat derketiye û 238 kes li otêlê diman.
Wezîr Yerlîkaya diyar kir ku nasnameya 52 kesên mirine hatine tespîtkirin û cenazeyên 45 kesan radestî malbatên wan hatine kirin. Li saziyên tiba edlî ji bo kesên nasnameyên wan nehatine tespîtkirin analîzên DNAyê dewam dikin.
Xwediyê otelê hat desteserkirin
Wezîr Yerlîkaya got, "Em weke dewleta hiqûqê çi pêwîst be wê bikin. Pêvajoya lêpirsîna edlî û dozgeriyê dê bi baldarî bê meşandin."
Her wiha Yerlîkaya diyar kir ku ekîbên AFADê dê li otêlê kontrola dawî bikin û agahiyên derbarê kesên hatine desteserkirin de dê Wezareta Edaletê parve bike.
Wezîrê Dadê Yilmaz Tunç ragihand ku xwediyê otelê jî hatiye desteserkirin. Her weha heta niha 9 kes hatin desteserkirin.
Serokomar Recep Tayyîp Erdogan ji bo roja Çarşema 22ê Kanûnê şîna neteweyî îlan kir û destnîşan kir ku dê alên li seranserê Tirkiyeyê û balyozxaneyên welatên biyanî di nîvî de bên daliqandin.
(EMK/AY)
