Arşîva Şakiroyî û du îdia

Îbrahîm Şahîn, yek ji nivîskarên pirtûka “Dengbêj Şakiro”, îdia kir ku Enstîtuya Çandê ya Kurdî-Almanî arşîva wan a Şakiroyî ji wan standiye û wê bêyî destûra wan bikar bîne. Hakan Akay, Dîrektorê Enstîtuyê van îdiayan red dike.

Ferid Demirel

Fotograf: kulturservisi

Piştî ku Enstîtuya Çandê ya Kurdî-Almanî aşkere kir û got, wan bi Umît Denîz, kurê Şakiroyî re peyman îmze kiriye û ew ê hemû stranên Şakiroyê ji nû ve biweşînin, Îbrahîm Şahîn, yek ji nivîskarên pirtûka “Dengbêj Şakiro” îdîa kir ku ew arşîv ya wan e.

Bixwîne - Hemû stranên Şakiroyî wê ji nû ve werin weşandin

Şahînê ku Weşanxaneya Nûbiharê pirtûka wî ya bi Omer Guneşî re amade kiriye, çap kiribû, wiha nivîsandibû: “Li ser daxwaza enstîtuyê me ji wan re 270 kilam ên Dengbêj Şakiro û 112 kilam jî ên Dengbêj Reso şandin. Wek ku tenezûl nekirine çavkanî nîşan bidin herwiha hijmara kilamên ku me dane wan jî durist nedane. Mixabin!”

Li ser vê rewşê bi rêya telefonê me bi Îbrahîm Şahînî re peywendî danî ku li Elmanyayê dijî.

"Me hemû stran dan Cewad Merwaniyî"

Fotograf: Ibrahîm Şahîn û Omer Guneş

Şahînî got ku hefteyek deh roj berê Cewad Merwanî li wan geriyaye û gotiye ew ê stranên Şakiroyî biweşînin û xwestiye ew stranên Şakiroyî, yên wan berhev kirine, ji wî re bişînin.

Îbrahîm Şahînî ev zanyarî dan: “Me got temam û weke mp3 me jê re şandin. Her weha piştî wê Merwaniyî ji me xwest ku em PDFa pirtûkê jê re bişînin. Ji me re got ku, ‘ez ê notayên wan derxim’. Lê je ber mafê weşanê di deste Nûbiharê de ye, me berê wî daye wir.

“Paşê me dît ku waye Enstîtuya Çandê ya Kurdî-Almanî dibêje, ew ê stranên Şakiroyî biweşînin. Enstîtu ji me re dibêje ‘wan ji Umît Denîz, kurê Şakiroyî standine. Sê sal berê me bi Umît Denîzî re hevpeyvîn kir, got li bal min ti tiştek nîne. Dibêjin me ji Çagdaş Muzîkê standine. Yên li bal Çagdaş Muzîkê 80 stran in. Ji xwe li ser înternetê jî tene sed û bîst û çend stranên Şakiroyî hene. Lê li bal 272 stran hene.”

Şahînî got ku ti armanceke wan a tîcarî nîne û kî bixwaze ew ê tiştên li ber desten xwe bidin wan: “Em bi xwe dixwazin belav bibe. Me li ser YouTubê weşandine. Em ti tiştî naxwazin, hema we tenê çavkaniya wê nîşan bida.”

Hakan Akay: Mi ti tişt ji ti kesî negirtiye

Fotograf: Hakan Akay û Umît Denîz

Hakan Akay, Dîrektorê Enstîtuya Çandê ya Kurdî-Almanî jî ji bianetê re got ku, peymana wan bi Umît Denîz re çêkiriye destpêka xebata derbarê Şakiroyî de ye. Bi vê peymanê re ew diwxazin mafên Şakiroyî biparêzin.

Akayî diyar kir ku wan ti tişt ti kesî negirtiye û wiha dewam kir:

“Me heta niha arşîva ti kesî jê nestendiye. Ji xwe me hîna tiştek neweşandiye. Bi peymana duh re me dest bi xebatekê kir. Em ê bang li her kesî bikin ku ti tiştên di destên wan de heye, bila bigihînin me. Em ê ji bo vê, kampanyayekê çêbikin.

“Ji duh ve gelek kes li me digerin û ji ber vî karî kêfxweşiya xwe tînin ziman. Ev jî dide nîşan ku em çiqas karekî baş û rast dikin. Di vê pêvajoyê de em li bendê ne ku ev lêkolînerên me jî tê de, hemû kes werin û em bi hev re li ser navê Şakiroyî xebatekê bidin destpêkirin.

“Şakiro ne mal û milkê ti koleksiyoner an jî arşîvgeran e.

“Em û malbata Şakiroyî, em ê bi vê peymanê re, mafên jî yên hiqûqî û yasayî biparêzin. Ev berteka hatiye dayîn jî dide xuyakirin ku karê me çend zehmet e.

“Em li bende ne ku ji malbata Şakiroyî û ji Enstîtuyê lêborînê bixwazin. (FD)

Cihê Nûçeyê

Navenda Nûçeyan a BIAyê

Ferid Demirel

[email protected]

Hemû Nivîsên wî/wê

Edîtorê bianet kurdiyê ye. Ji Zaningeha Marmarayê, ji beşa Rojnamegerîyê derçûye. Li Zaningeha Marmarayê di beşa Rojnamegerîyê de masterê dike. Di rojnamaya Birgünê, Dicle Haber...

Edîtorê bianet kurdiyê ye. Ji Zaningeha Marmarayê, ji beşa Rojnamegerîyê derçûye. Li Zaningeha Marmarayê di beşa Rojnamegerîyê de masterê dike. Di rojnamaya Birgünê, Dicle Haber Ajansı (DİHA), Dem Tv, Rûdaw Tv û Sputnik Kurdistanê de wek nûçegîhan, edîtor, gerînendeyê nûçeyan û şef edîtor kar kiriye. Edîtorî û redaktoriya gelek pirtûkan kiriye. Yek ji nivîskarên “E- Kitêba Rojnamegeriya Kurdî a Dijîtal”, “Ferhengoka Kurdî-Tirkî ya Nûçegihaniya Zayenda Civakî” ye. Nivîseke wî ya lêkolînê di pirtûka “Haber Analizi ve Arşiv İncelemeleriyle Türkiye’de 9 Gazete” de hatiye weşandin. Li bianetê û Botan Internationalê, di Kargehên Medyaya Kurdî de dersên dîroka çapemeniya kurdî, rojnamegeriya mafparêz û hevpeyvînan daye. Pirtûkek bi navê "Guldesteyek ji Baxê Rewanê" (Sor Yay.), yek jî bi navê "Çîrokên Şêwra Ermenan" (Cervantes Yay.) derxistiye. Xwediyê Xelata Rojnamegeriyê ya Mûsa Anterî û Rojnamegerên Çapemeniya Azad (di beşa nûçeyên kurdî de) yê sala 2023yan e.