Bostano yek ji stranên albûma Alî Dogan Gonultaşî ya bi navê “Kıği”yê ye. Gonultaş wê heta 6ê Gulanê stranan ji vê albûma xwe biweşîne.
Ev yekem albûma Gonultaşî ye ku bi tena serê xwe weşandiye. Wî beriya niha bi koma Ze Tijê re karê xwe yê muzîkê dikir. Paşê bi tena serê xwe ev kar berdewam kir. Di vê demê de bi navê “xo bi xo” konser didan ku di van konseran de bêhtir performanseke akûstîk nîşan dida. Niha jî yekem albûma xwe ya solo derxistiye.
Gonultaşî Bostano weke yekem strana ji vê albûmê weşandiye. Straneke gelêrî ye û bi zazakî ye, zazakiya li Çewligê tê axavtin. Çavkaniya vê stranê Rizoyê Biroke û Hayrî Kizilkan in.
Zilamekî ku kêfa wî gelekî ji bostanê wî re tê, stranek avêtiye ser û di stranê de dibêje: “Bostano lo bostano Wey bostanê mi xiyar o Xiyar o dendik dano”.
Di nava stranê de her weha behsa evîndara xwe ya bi nave Zeyneb dike: “Bostano lê bostano Wey Lê Zeynê Zeyna mi Bostanê mi dostan o.”
Gonultaşî stran bi şêweyeke nû şîrove kiriye lê bi heman awayî hewl daye reseniya wê jî biparêze. Tembûr, mey, zûrna, timbilka gelêrî di stranê de hatine bikaranîn, lê dengê Alî Dogan Gonultaşî di tevahiya stranê de bi ser wan ketiye û di stranê de gelekî diyar e. Gonultaşî rengê dengê xwe di vê stranê de bi vê strana gelêrî careke din û bi awayekî xurtir nîşan daye.
Di albûma Gunaltaşî de wê 10 stran hebin. Bostano di dawiya meha Adarê de weşandiye. Alî Dogan Gonultaş wê heta 6ê Gulanê sê stranan ji vê albûmê biweşîne: 8ê Nîsanê “Kütahya’nın Dağları / Mira Naye”, 22yê Nîsanê “Entercîme”. Roja 6ê Gulanê jî wê tevahiya albûmê derkeve.
Derbarê Alî Dogan Gonultaşî de
Keda wî di muzîkên fîlmê “Benim Kendi Hayatım” (2014) û “Şeng” (2021) de heye. Her weha di projeya bi navê “Somut Olmayan Kültürel Miras Örneği Olarak Kentin Sesi (Diyarbakır)” de besteyên wî hatin bikaranîn.
Ji bo Can TVyê bernameya bi navê “Sesler ve İzler” (Deng û Şop) (2020) û ya bi navê “Müzik Olayı” (Bûyera Muzîkê) (2022) amade kiriye û pêşkêş kiriye. (FD)
